2Jo | NdeIBE | STEP |

2 John

1 Mina omdala, Ngilobela inkosikazi ekhethiweyo labantwana bayo, engibathandayo eqinisweni – kungayisimi kuphela, kodwa labo bonke abalaziyo iqiniso – 2 ngenxa yeqiniso, elikhona kithi njalo elizakuba lathi kuze kube nininini:

3 Umusa, lesihawu kanye lokuthula okuvela kuNkulunkulu uBaba lakuJesu Khristu, iNdodana kaBaba, kuzakuba lathi ngeqiniso langothando.

4 Kungithokozise kakhulu ukufumana abanye babantwana benu bephila ngeqiniso, njengokulaywa kwethu nguBaba. 5 Khathesi-ke, nkosikazi ethandekayo, ngikulobela umlayo omutsha kodwa esasilawo kusukela ekuqaleni. Ngicela ukuba sithandane. 6 Uthando yilolu: ukuba siphile ngokulalela imilayo yakhe. Njengoba uzwile kusukela ekuqaleni, umlayo wakhe yikuthi uphile impilo yothando.

7 Abakhohlisi abanengi, abangavumiyo ukuthi uJesu Khristu weza engumuntu, sebekhona emhlabeni. Lowomuntu onjalo ungumkhohlisi lomphikuKhristu. 8 Qaphelani ukuba lingalahlekelwa yilokho elakusebenzelayo, kodwa ukuba livuzwe okupheleleyo.

9 Lowo odlulela phambili angabe esaqhubeka ngemfundiso kaKhristu kalaye uNkulunkulu; lowo oqhubekayo ngemfundiso uloBaba leNdodana. 10 Uma umuntu esiza kini engalethi imfundiso le, lingamngenisi ezindlini zenu njalo lingamamukeli. 11 Lowo omamukelayo uyahlanganyela emisebenzini yakhe emibi.

12 Ngilokunengi engingalilobela ngakho, kodwa angifuni ukusebenzisa iphepha leyinki. Kodwa ngithemba ukuthi ngizalethekelela ngikhulume lani ubuso ngobuso, ukuze intokozo yethu iphelele.

13 Abantwana bakadadewenu okhethiweyo bayakubingelela.